Parc Ffyniant i Greu Dros 2,000 o Swyddi ar Ynys Môn

Mae Stena Line wedi cyhoeddi bod ei gynlluniau ar gyfer parc technoleg newydd arfaethedig yn y Parc Ffyniant, ar gyn safle Alwminiwm Môn, bellach wedi’u cymeradwyo gan Gyngor Sir Ynys Môn.

Mae caniatâd amlinellol wedi’i sicrhau ar y safle 220 erw a fydd yn cynnwys dros 220,000 metr sgwâr o ganolfan ddata, datblygiad diwydiannol a swyddfeydd fel rhan o gampws carbon isel newydd. Bydd hefyd yn cynnwys system storio ynni batri sy’n elwa o gysylltiad grid presennol y safle.

Parc Ffyniant yw’r safle mawr cyntaf i ddod ymlaen fel rhan o Borthladd Rhydd Ynys Môn, sy’n eistedd o fewn safle treth “Parth Ffyniant Ynys Môn” y Porthladd Rhydd. Yn dilyn y cyhoeddiad yn cymeradwyo Achos Busnes Llawn y Porthladd Rhydd, mae llwyddiant cais cynllunio’r parc technoleg yn nodi cam sylweddol ymlaen i gyflawni ymrwymiadau twf allweddol y Porthladd Rhydd.

Ar eu gorau, rhagwelir y bydd y cynigion yn cynhyrchu twf o hyd at £578 miliwn yn yr economi leol bob blwyddyn, cyfwerth â thraean economi gyfredol Ynys Môn, ac yn creu oddeutu 1,200 o swyddi. Byddai’r cyfnod adeiladu yn creu 890 o swyddi ychwanegol ar ben y cyfleoedd cadwyn gyflenwi.

Yn ogystal â swyddi newydd, bydd y prosiect yn sianelu buddsoddiad wedi’i dargedu i hyfforddiant, addysg a datblygu sgiliau lleol – gan sicrhau bod cymunedau ledled Ynys Môn yn elwa o gyfleoedd cynyddol yn agos at adref.

Dywedodd Ian Hampton, Rheolwr Gyfarwyddwr Porthladd Rhydd Ynys Môn:

“Rydym wrth ein bodd bod y Parc Ffyniant wedi’i gymeradwyo. Mae’r datblygiad hwn yn adlewyrchu ein hymrwymiad i Ynys Môn a Phorthladd Rhydd Ynys Môn, gan ein helpu i gyflawni addewidion y Porthladd Rhydd, creu swyddi i bobl Ynys Môn, amddiffyn treftadaeth ac iaith Cymru, a hybu twf economaidd ledled Gogledd Cymru. Byddwn nawr yn canolbwyntio ar weithio gyda’n partneriaid a’r gymuned leol i gyflawni cynlluniau manylach wrth i ni barhau i fuddsoddi yn Ynys Môn.”

Dywedodd Pennaeth Rheoleiddio a Datblygu Economaidd Cyngor Sir Ynys Môn, Christian Branch:

“Mae sicrhau caniatâd cynllunio amlinellol yn gam arwyddocaol arall ymlaen i’r Parc Ffyniant. Mae’r garreg filltir bwysig hon yn hanfodol i ailddatblygu’r safle tir llwyd, a fydd yn cyfrannu at wireddu cyflawni gweledigaeth ehangach Porthladd Rhydd Ynys Môn.”

“Bydd y datblygiad arfaethedig yn helpu i ddarparu lefelau sylweddol o swyddi a buddsoddiad yn y safle a fydd yn sbarduno twf ac yn dod â manteision economaidd-gymdeithasol ehangach i Ynys Môn a Gogledd Cymru.”

“Mae’r cais wedi cael ei asesu’n drylwyr gan y Cyngor a rhanddeiliaid i sicrhau ei fod yn darparu manteision cymdeithasol, economaidd ac amgylcheddol ystyrlon i’r gymuned leol, ac mae wedi’i gymeradwyo yn amodol ar nifer o amodau cynllunio.”

Bydd y cais cynllunio llawn nawr yn cael ei symud ymlaen yn unol â’r broses gynllunio strategol.”

Yn dilyn rhoi caniatâd cynllunio amlinellol, bydd dyluniadau mwy manwl, gan gynnwys cynllun, ymddangosiad, mynediad a thirlunio’r safle, yn cael eu cyflwyno. Bydd caniatâd cynllunio llawn yn cael ei roi os bydd yn llwyddiannus.