Xplore! yn Cydweithio â HyNet

Mae Canolfan Darganfod Gwyddoniaeth Xplore! yn Wrecsam yn falch o gyhoeddi cydweithrediad cyffrous newydd gyda HyNet i gyflwyno cyfres o weithdai deniadol sy’n canolbwyntio ar hydrogen a thechnolegau carbon isel eraill. Mae’r sesiynau ymarferol hyn eisoes wedi cyrraedd dros 350 o ddisgyblion Cyfnod Allweddol 2 ar draws y rhanbarth, gan danio diddordeb mewn gwyddoniaeth, cynaliadwyedd, a gyrfaoedd y dyfodol.

HyNet yw prif brosiect dadgarboneiddio diwydiannol y DU, gan arwain y ffordd tuag at ddyfodol carbon isel yng Ngogledd Cymru a’r Gogledd Orllewin. Trwy ddisodli nwy naturiol â hydrogen carbon isel mewn diwydiannau fel gweithgynhyrchu gwydr, a dal allyriadau diwydiannol o gynhyrchu sment, mae HyNet yn diogelu swyddi lleol ac yn denu buddsoddiad i’r rhanbarth.

“Rydyn ni’n hynod gyffrous i fod yn cydweithio â Chanolfan Darganfod Gwyddoniaeth Xplore! yn Wrecsam, i gyflwyno gweithdai ymarferol mewn ysgolion ar draws Gogledd Cymru a’r Gogledd Orllewin. Wrth i HyNet symud o weledigaeth i realiti, rydyn ni’n ymrwymedig i helpu pobl ifanc i ddeall newid hinsawdd ac i’w hysbrydoli am botensial peirianneg i warchod yr amgylchedd.”

Datblygwyd y gweithdy newydd gan dîm arbenigol Cyfathrebwyr Gwyddoniaeth Xplore! ac mae’n cyflwyno plant i’r wyddoniaeth y tu ôl i ddal carbon a hydrogen, eu rôl wrth fynd i’r afael â newid hinsawdd, a’r seilwaith sy’n cefnogi dyfodol carbon isel.

“Nid ynni yn unig yw HyNet – mae’n ymwneud â’r dyfodol. Mae’r gweithdai hyn yn helpu plant i weld eu hunain fel rhan o’r ateb. Rydyn ni’n hynod falch o gydweithio â HyNet i ddod â gwyddoniaeth y byd go iawn i’r ystafell ddosbarth mewn ffordd sy’n hwyl, ysbrydoledig ac effeithiol,” meddai David Crewe, Cydlynydd Addysg yn Xplore!

Mae’r sesiwn yn dechrau gyda chyflwyniad ymarferol i esbonio beth yw hydrogen a dal carbon a pham eu bod yn bwysig, cyn i’r disgyblion weithio mewn timau i ddylunio eu rhwydwaith piblinell HyNet eu hunain. Rhaid i bob grŵp gysylltu safleoedd cynhyrchu hydrogen â ffatrïoedd, gan ystyried cost, effeithlonrwydd a chynllunio strategol. Mae’r tîm sy’n adeiladu’r rhwydwaith mwyaf cost-effeithiol yn ennill, ond mae pob disgybl yn gadael gyda sgiliau gwerthfawr mewn gwyddoniaeth, mathemateg, daearyddiaeth, gwaith tîm a siarad cyhoeddus.

“Cafodd y gweithgareddau eu hegluro’n glir ac roeddent yn galluogi’r plant i weithio mewn timau, gwneud llawer o’u penderfyniadau eu hunain, ac i ddatrys problemau,” meddai athrawon Blwyddyn 6 o Ysgol Gynradd Newall Green. Ychwanegodd un disgybl, “Ydyn nhw’n dod yn ôl yfory!? Mi wnes i fwynhau hynny’n fawr.”

Mae’r bartneriaeth hon yn adlewyrchu ymrwymiad ar y cyd i addysg, cynaliadwyedd ac arloesedd — gan rymuso’r genhedlaeth nesaf i ddychmygu a chreu byd glanach, gwyrddach.

Mae Xplore! yn gyffrous i barhau i gyflwyno’r gweithdai ysbrydoledig hyn drwy gydol y flwyddyn, gan helpu ysgolion ar draws y rhanbarth i danio chwilfrydedd a hyder ymhlith dysgwyr ifanc. Trwy gyfuno dysgu STEM ymarferol â pherthnasedd byd go iawn, mae’r bartneriaeth hon â HyNet Gogledd Orllewin yn grymuso’r genhedlaeth nesaf i chwarae rhan weithredol wrth lunio dyfodol mwy cynaliadwy.

Yn dilyn llwyddiant eleni, bydd Xplore! yn parhau i weithio gyda HyNet hyd at 2026, gyda’r nod o ehangu’r rhaglen i gyrraedd dros 1,000 o ddisgyblion Cyfnod Allweddol 2 a 3. Gall ysgolion sydd â diddordeb mewn dod â’r gweithdai i’w hystafell ddosbarth gysylltu drwy bookings@xplorescience.co.uk i gael rhagor o wybodaeth.